कका के बिहाव (सार-छंद)

*कका के बिहाव* (सार-छंद)

कका बता कब करबे शादी,देख जवानी जाथे !
बइठे रोथे दादी दादा,संसो घानी खाथे !!1!!

ढ़ींचिक-ढ़ींचिक नाचत जाबो,बनके तोर बराती !
पागा-पगड़ी माथ बँधाये,देखे राह घराती !!2!!

गँड़वा-डीजे जेन लगाले,नागिन पार बजाबो !
बुड़हा-बुड़ही रंग जमाही,सबला खींच नचाबो !!3!!

दाई कइही जी देरानी,घर अँगना के रानी!
आव-भाव मा देवी रइही,देही सबला पानी !!4!!

रोजगार के करले जोखा,करथच रोज बहाना !
गाँव गली मा सुनथे बाबू,देथैं कतको ताना !!5!!

नवा-नवा तो कपड़ा लाबे,बनबे बढ़िया राजा !
इसनो अबरख साज लगाबे,दिखबे सुघ्घर ताजा !!6!!

काकी पाबो भाग जगाबो,मया दया तो देही !
पइधे रइबो हमतो रोजे,चूमा-चटका लेही !!7!!

अटकन-चटकन वो खेलाही,हार-जीत के खेला !
ठोंस सजा हे चीपो-लादो,पाही रोज झमेला !!8!!

केंउ मेंउ के पारी आही,हमतो कान बचाबो !
काकी लमरत दौंड़ लगाही,ओला तेज भगाबो !!9!!

पत्तो कइही आरा-पारा,तोरे सोर उड़ाही !
कइबे तँयहर चटनी पीसे,बोलत साठ गुड़ाही !!10!!

गाहीं बढ़िया गीत भड़ौनी,सुनबो कान दबाके!
खाबो पींयर भात अघाके,लाडू खास चबाके !!11!!

देख कका तँय करले शादी,देख-ताक के आजा !
जाबो आँसो हमन बराती,लान लगाबो बाजा !!12!!

*रचनाकार : असकरन दास जोगी*
ग्राम : डोंड़की,पोस्ट+तह : बिल्हा, जिला : बिलासपुर (छ. ग.)
मो. नं. : 9340031332
www.antaskegoth.blogspot.com

Comments

Popular posts from this blog

दिव्य दर्शन : गिरौदपुरी धाम(छत्तीसगढ़)

पंथी विश्व का सबसे तेज नृत्य( एक विराट दर्शन )

खंजर