छत्तीसगढ़ के बात
*छत्तीसगढ़ के बात*
छत्तीसगढ़ माटी धान कटोरा !
नवा बिहान के करव अगोरा !!
महानदी के निर्मल पानी !
रायपुर हवै हमर राजधानी !!
गुरु घासी के बाना उचाबो !
सत्य अहिंसा के गीत गाबो !!
बीर नरायन ए माटी के लाल !
बन जाबो क्रांत्ति के मशाल !!
बन भँईसा ल जानव तुम !
मैना संग सबो नाचव तुम !!
गोंदा बनके फूलबो चँवरा म !
खाबो डँटके बासी कँवरा म !!
करम डार के कर्मा गीत !
साल-सरई सबके मीत !!
रउत नाचा के दोहा पोठ !
सुनलव छत्तीसगढ़िया गोठ !!
पं. सुंदर लाल शर्मा हे महान !
खूबचंद बघेल के करलव धियान !!
तीजन बाई के गर्जत पंडवानी !
कोदूराम दलित के छंद छानी !!
कुतुबमिनार ले बड़े जैतखाम इहाँ !
गोठियावत घड़ी घड़ी चौंक जिहाँ !!
सुनव गुनव छत्तीसगढ़ के बात !
गाथैं गीत ददरिया आवत जात !!
*रचनाकार:असकरन दास जोगी*
मो.9340031332
www.antaskegoth.blogspot.com
Comments
Post a Comment