फुटानी
#फुटानी
बावन कोसी के दूरा म
मन के सोना दिल के हीरा हँव टूरा म
कतको के सुने होहव कहानी
फेर बिल्कुल नइ मारौं मैं फुटानी
मोर मया तो सांगा म नइ समावय
वो जकाड़ो कहत रहिच
पैरा डोरी म कटकट ले बोझा बाँध दे
बोह के ले जाहँव....
फेर कहेवं...
देख बाद म नटबे झन
करी लाडू कस पाग बांधहँव
बुढ़वा के चाबे ले लोढ़वा के फोरे ले
चिटकन नइ तड़कय
अउ सुन न
कहूँ अंगरी ल छोड़
मुरवा ल धर लेहूँ
कोनो बैरी छोड़वाय बर कतको तीर लय
गोइहा कस खोभियाय
टस ले मस नइ होवय
तब उहू कहिच
अइसन हे त...
अरे हमर घरबार
अंगना म फूले चंदैनी गोंदा कस
रुगबुग ले रइही
अउ जिनगी बसंत असन सतरंगी खुशी देखाही
बस तहाँ का
झम ले आँखी खुलगे
देखत सपना टूटगे |
#असकरन_दास_जोगी
Comments
Post a Comment