परेतीन
#परेतीन
परप परे म
परथच पाहो
अइसन तो हिरक्के आवच नहीं
कतको बलालँव कलप-कलप के
सुन न...
बड़ निर्मोही हवच
फेर तोर ल सुघ्घर कोनो नइहे
ए संसार म
झूठ नहीं सच कहिथँव
कभू देख अपन आप ल
मोर आँखी म
तोर मया के का कहना
होथँव चेत ल बिचेत
पता हे....
झूमरत रहिथँव
बोइर झूड़ा बीच
फेर आज कल तोला का होगे
मिलच नहीं कहूँ
मैं तोर बर रोवत रहिथँव
ओय...
अइसन काबर करथच....?
निर्दयी परेतीन
झन रीसा मोर ले
तोला कइसे मनाना हे
मैं जानथँव
अतकेच तो लेबे न...?
चेरिहा भर चना मुर्रा
कारी चूरी
अउ लाली लुगरा के सूँत
आय कर जाय कर
कोनो ल झन बताय कर
अंतस म तो समाय हवच
कभू मया घलो जताय कर |
#असकरन_दास_जोगी
Comments
Post a Comment