दगा देवइया के नइ मिलय चिन्हारी
#दगा_देवइया_के_नइ_मिलय_चिन्हारी
इहाँ मया करइया कतको हें
दगा देवइया के नइ मिलय चिन्हारी
जीव म जीव डार देथें
हिरदे ल धड़का देथें
इहां खेल खेलइया कतको हें
दगा देवइया के नइ मिलय चिन्हारी...
इहां मया करइया कतको हें.....(लड़का)
आँखी म आँखी मिला लेथें
झूठ ल सच बता देथें
इहां भरोसा म बंधइया कतको हें
दगा देवइया के नइ मिलय चिन्हारी...(लड़की)
मयारू बर खुद ल भुला देथन
वोकर आगू पाछू दिन रात पहा देथन
इहां मीठ मीठ गोठियइया कतको हें
मीठलबरी के नइ मिलय चिन्हारी
इहां मया करइया कतको हें....(लड़का)
अंतस म कोनो ल बसा लेथन
सुख चैन अपन गवाँ देथन
इहां दवा देवइया कतको हें
दरद देवइया के नइ मिलय चिन्हारी
इहां मया करइया कतको हें...(लड़की)
ककरो आशा म रहिके,अंधमंधा जाबे |
कलपत रइही जीवरा,फेर संसो म तैं सूखा जाबे |
इहां संग देवइइया कतको हें...
संग छोड़इया के नइ मिलय चिन्हारी...(लड़का)
तन मन कोनो ल सँउप के,दुनिया अपन बना लेबे |
लेके वादा संग जीये के,मन के मयारू बना लेबे |
इहां वादा करइया कतको हें...
वादा टोरइया के नइ मिलय चिन्हारी...
इहां मया करइया कतको हें...(लड़की)
#असकरन_दास_जोगी
Comments
Post a Comment